ཁྲི་སྲོང་ལྡེའུ་བཙན།
༢༠༽ དེར་རྒྱལ་པོའི་ཐུགས་ལ། དམ་ཆོས་སྤེལ་པར་དགེ་འདུན་པའི་སྡེ་འཛུགས་དགོས། དེ་བས་མཁན་པོ་ཞིག་གདན་འདྲེན་ཞུས་ན་ལེགས་དགོངས་ཏེ། ཆོས་བློན་སྦ་གསལ་སྣང་རྒྱ་གར་དུ་མངགས།
༢༡༽ སྦ་གསལ་སྣང་ལོ་ཚ་བ་འཁོར་དང་བཅས་རྒྱ་གར་དུ་ཕེབས་ནས། དཔལ་ན་ལེན་དྲའི་མཁན་ཆེན་བོདྷིསཏྭའམ་ཞི་བ་འཚོའི་ཞབས་ལ་ཕྱག་འཚལ་ནས་སྐྱབས་འཇུག་ཞུས་པས་མཁན་པོས་ཞལ་བཞེས་གནང༌།
༢༢༽ སྦ་གསལ་སྣང་གིས་མཁན་པོ་གདན་དྲངས་ཏེ་བྲག་དམར་ཕོ་བྲང་དུ་འབྱོར་བ་དང༌། བཙན་པོས་གསེར་བྱེ་བྲེ་གང་སོགས་འབུལ་བ་དང་བཅས་བསུ་བར་ཕེབས། མཁན་པོས་རྒྱལ་བློན་འཁོར་དང་བཅས་པར་དམ་ཆོས་རྒྱ་ཆེར་གསུངས།
༢༣༽ འོན་ཀྱང་བོན་ལ་དད་མཁན་མང་པོས་ངོ་རྒོལ་ཤུགས་ཆེན་བྱས་པས། བློན་པོ་ལ་ལས་བོན་དང་ཆོས་གཉིས་ཀ་བྱས་ན་འགྲིགས་མིན་སོགས་གླེང་སྟེ། གནད་དོན་དེ་ལས་སླ་བོར་ཐག་གཅོད་གནང་མ་ཐུབ།
༢༤༽ མཐར་ཞི་བ་འཚོས། “རྒྱལ་ཁབ་གཅིག་ལ་ཆོས་ལུགས་གཉིས་འོང་དཀའ། ང་ཚོས་རྩོད་པ་བྱེད། སུ་ཞིག་རྒྱལ་ན་དེའི་ལུགས་སུ་བྱ།” ཞེས་གསུངས་པར་བོན་པོ་ཚོས་ཀྱང་མོས་མཐུན་གནང༌།
For the audio files