ཁྲི་སྲོང་ལྡེའུ་བཙན།
༦༠༽ དེ་ནས་བཻ་རོ་ཙ་ན་རི་དྭགས་རྒྱ་ལས་ཐར་ལྟར་བྲོས་ནས་སོང༌། བཙུན་མོ་ངོ་ཚ་དང་ཁོང་ཁྲོས། རང་གི་ན་བཟའ་རལ་ཅིང་བྲང་ཁར་སེན་མོས་བཏབ་སྟེ་ངུ་འབོད་བྱས། འཁོར་རྣམས་བོས་ནས་བརྙས་བཅོས་བཏང་ཞེས་བསྒྲགས།
༦༡༽ གཏམ་དེ་བཙན་པོའི་སྙན་ལ་འཁྱོལ་བས་ཐུགས་རབ་ཏུ་སྐྱོ། བཻ་རོ་ཙ་ནར་ཉེས་འགེལ་བྱས་པས་ཚ་བ་རོང་དུ་བྲོས། དེ་བཞིན་སློབ་དཔོན་དང་རྒྱལ་པོའི་དབར་ལའང་ཕྲ་མ་དང་མི་ཁ་མང་པོ་འཁོར།
༦༢༽ དེར་གུ་རུ་རིན་པོ་ཆེས་ཀྱང་འགྲོ་དོན་མི་འོང་བར་དགོངས་ཏེ། རིན་ཆེན་གསང་གཏེར་དུ་མ་སྦས་ཤིང༌། མཐར་རྒྱལ་པོ་སོགས་ནང་འཁོར་འགའ་ཞིག་ལ་མ་འོངས་ལུང་བསྟན་གནང་ནས་ལྷོ་ནུབ་སྲིན་པོའི་ཡུལ་དུ་ཕེབས།
༦༣༽ རྒྱལ་པོ་ཐུགས་སྐྱོ་བའི་ངང༌། སྲས་མུ་ནེ་བཙན་པོ་ལའང་ཆོས་ལ་སློབ་གཉེར་གནང་བཅུག་པ་དང་ལྷན་དུ། སྲིད་སྐྱོང་ཚུལ་གྱི་བསླབ་བྱ་དང་བཅས་རྟག་ཏུ་སྦྱོང་བརྡར་སྤྲོད་ཀྱིན་ཡོད།
༦༤༽ རེ་ཞིག་ན་རྒྱའི་ཧ་ཤང་མཧཱཡ་ན་ཟེར་བ་ཞིག་གིས་ལུས་ངག་གི་དགེ་བས་འཚང་མི་རྒྱ་ཚུལ་དང༌། ཡིད་ལ་ཅི་ཡང་མི་བྱེད་པའི་སྒོམ་པས་འཚང་རྒྱ་ཚུལ་གྱི་ལོག་ཆོས་འཆད་པ་པོ་ཞིག་བོད་ལ་སླེབས།
For the audio files