གཉའ་ཁྲི་བཙན་པོ།
༥༠༽ འོན་ཀྱང༌། རྒན་མོ་ལོ་ན་ཆེས་བགྲེས་པས་དབང་པོ་ཉམས་ཏེ་ལོག་པར་གོ་སྟེ། འོ་ན་རྒྱལ་ས་མི་ཟིན་ཟེར་ནས་མཚན་གྲི་གུམ་བཙན་པོ་ཞེས་ལོག་པར་བཏགས་ཞེས་གྲགས།
༥༡༽ སྲས་གྲི་གུམ་བཙན་པོ་ནར་སོན་རྗེས་རྒྱལ་ཁྲིར་མངའ་གསོལ་ཏེ། གསས་མཁར་ས་ལེ་བྱེའུ་ཚང་བཞེངས། ཀླུ་སྲིང་མེར་ལྕམ་བཙུན་མོར་བཞེས། སྲས་བྱ་ཁྲི། ཤ་ཁྲི། ཉ་ཁྲི་གསུམ་དང༌། སྲས་མོ་གཅིག་འཁྲུངས།
༥༢༽ སྐབས་ཤིག གཙང་གི་རྒྱལ་ཕྲན་ལོ་ངམ་རྟ་རྫིས་གྲི་གུམ་བཙན་པོའི་སྲིད་དབང་འཕྲོག་འདོད་ཀྱི་ཧམ་སེམས་བཅངས་ཏེ་བསམ་བློ་དྲུག་གསུམ་བཅོ་བརྒྱད་བཏང་མཐར། ལོ་ངམ་གྱིས་འ་ཞའི་བོན་པོ་དང་ལྐོག་འབྲེལ་བྱས།
༥༣༽ ལོ་ངམ་གྱིས། གྲི་གུམ་བཙན་པོ་ནི་ང་རྒྱལ་ཆེ་ཞིང་བོན་ལ་མི་དད། བློན་པོ་རྣམས་ཀྱང་ཕྲག་དོག་ཆེ་བས། ཁྱེད་ཅག་བོན་གཤེན་ཚོའི་གོ་གནས་རིམ་པས་འཆོར་ཉེན་ཆེ་ཚུལ་སོགས་བཤད་དེ། བོན་གཤེན་རྣམས་དང་གཡོ་ཇུས་བཤམས།
༥༤༽ གཙང་དང་འ་ཞའི་བོན་གཤེན་འགའ་ཞིག་གིས་རིམ་པས་བཙན་པོའི་སྐུ་གཤེན་གྱི་གོ་གནས་བཟུང་སྟེ། རྒྱལ་སྲིད་ལ་ཇུས་གཏོགས་ཤུགས་ཆེར་བྱས།
For the audio files