༄༅། །ལེགས་པར་བཤད་པ་རིན་པོ་ཆེའི་གཏེར་གྱི་དོན་འགྲེལ་བློ་གསལ་བུང་བའི་བསྟི་གནས་ཞེས་བྱ་བ་བཞུགས་སོ།།
མཛད་པ་པོ། འཇམ་མགོན་ས་སྐྱ་པཎྡི་ཏ་ཀུན་དགའ་རྒྱལ་མཚན།
རབ་བྱེད། => ༡ |༢ |༣ |༤ |༥ |༦ |༧ |༨ | ༩
རབ་བྱེད་གསུམ་པ། བླུན་པོ་བརྟགས་པ།
སྐྱེ་བོ་ངན་པ་འབྱོར་ཐོབ་ཀྱང་།།
ལྷག་པར་སྤྱོད་པ་ངན་པར་འགྱུར།།
འབབ་ཆུ་ཇི་ལྟར་ལྡོག་གྱུར་ཀྱང་།།
ཐུར་དུ་འབབ་པ་ཁོ་ནར་འདོད། །
དམན་ལ་སྤྱོད་པ་བཟང་བྱུང་ཡང་།།
དེ་ནི་བཅོས་མའི་རྣམ་ཐར་ཡིན།།
ཤེལ་ལ་ནོར་བུས་ཁ་བསྒྱུར་ཡང་།།
ཆུ་དང་ཕྲད་ན་རང་མདོག་སྟོན། །
བླུན་པོས་བྱ་བ་ལེགས་གྲུབ་ཀྱང་།།
སྟེས་དབང་ཡིན་གྱི་བསྒྲུབས་པས་མིན།།
སྲིན་བུའི་ཁ་ཆུ་དར་སྐུད་དུ།།
འགྲོ་བ་མཁས་ནས་བྱུང་བ་མིན། །
ཆེན་པོས་འབད་ནས་བསྒྲུབས་པའི་གྲོས།།
ངན་པས་སྐད་ཅིག་གཅིག་ལ་འཇོམས།།
ཞིང་པས་ལོ་ཟླར་འབད་པའི་ཞིང་།།
སེར་བས་སྐད་ཅིག་རྡུལ་དུ་རློག ། །
ངན་པ་ཕལ་ཆེར་རང་གི་སྐྱོན།།
གང་ཡིན་གཞན་ལ་འགོད་པར་བྱེད།།
ཁྭ་ཏས་མི་གཙང་ཟོས་པའི་མཆུ།།
ས་གཙང་གཞན་ལ་འབད་ནས་འཕྱིད། །
བླུན་པོ་བྱ་བ་ལ་སྦྱར་ན།།
དོན་ཉམས་དེ་ཡང་ཉམས་པར་འགྱུར།།
ཝ་སྐྱེས་རྒྱལ་པོར་བསྐོས་པ་ཡིས།།
འཁོར་སྡུག་རང་ཡང་བསད་ཅེས་གྲགས། །
རྨོངས་པ་བདེ་བ་འདོད་བཞིན་དུ།།
བྱ་བ་སྡུག་བསྔལ་འབའ་ཞིག་སྒྲུབ།།
གདོན་གྱིས་བཏབ་པའི་སྐྱེ་བོ་འགའ།།
སྡུག་བསྔལ་སྤང་ཕྱིར་ལྕེབ་པ་མཐོང་། །
བློ་ངན་དྲང་པོ་ལ་ལས་རང་།།
བརླག་འགྱུར་ལ་ལས་གཞན་ལ་གནོད།།
ནགས་ཀྱི་ཤིང་དྲང་རྩད་ནས་གཅོད།།
མདའ་ཡི་དྲང་པོས་ཕ་རོལ་གསོད། །
རྟག་ཏུ་གཞན་དོན་མི་སེམས་པ།།
དེ་ཡི་སྤྱོད་པ་ཕྱུགས་དང་མཚུངས།།
བཟའ་བཏུང་འབའ་ཞིག་དུད་འགྲོས་ཀྱང་།།
བསྒྲུབ་པར་ནུས་པ་མ་ཡིན་ནམ། །
ཕན་དང་མི་ཕན་མི་དཔྱོད་ཅིང་།།
བློ་དང་ཐོས་པ་མི་སྒྲུབ་པ།།
ལྟོས་འགྲངས་འབའ་ཞིག་དོན་གཉེར་བ།།
སྤུ་མེད་པ་ཡི་ཕག་པ་ཡིན། །
བླུན་པོའི་དབུས་ན་དགའ་ཞིང་རྩེ།།
མཁས་པའི་མདུན་སར་ཞུམ་ཞིང་འཛུར།།
ནོག་དང་ལྐོག་ཤལ་མེད་ན་ཡང་།།
ཡ་སོ་ཅན་གྱི་བ་ལང་ཡིན། །
གང་ན་བཟའ་བཏུང་ཡོད་དེར་རྒྱུགས།
དགོས་པའི་བྱ་བ་བཅོལ་ཡང་འབྲོས།།
གཏམ་དང་བཞད་གད་ཤེས་ན་ཡང་།།
མཇུག་མ་མེད་པའི་ཁྱི་རྒན་ཡིན། །
རྨིག་རྗེས་ཆུ་ཡིས་དགང་སླ་སྟེ།།
མཛོད་ཆུང་ནོར་གྱིས་དགང་བ་སླ།།
ཞིང་ཆུང་ས་བོན་གདབ་སླ་སྟེ།།
བློ་ཆུང་རིག་པས་མགུ་བ་སླ། །
དྲེགས་བཅས་བླུན་པོ་ཁས་ལེན་ཅན།།
ཆེན་པོ་ཡིན་ཡང་ཉམས་པར་འགྱུར།།
གོམ་པ་གང་གི་ས་བྱིན་པས།།
སྟོབས་ལྡན་གྱིས་ནི་ས་གསུམ་ཤོར། །
བློ་ཆུང་སེམས་ལ་ཁོན་འཛིན་ཅན།།
གནོད་པ་བས་ཀྱང་རྣམ་འགྱུར་སྔ།།
ཁྱི་ངན་དགྲ་བོ་མཐོང་ན་ཡང་།།
རྨུགས་པའི་ཐོག་མར་ཀུ་ཅོ་འདོན། །
བླུན་པོས་གསོག་པའི་སྡུག་བསྔལ་ཉིད།།
མྱོང་གི་སྤྱོད་པའི་བདེ་མི་མྱོང་།།
ཡང་ཡང་མྱུལ་ཞིང་ལྟ་བ་ཡི།།
འཇུངས་པའི་ནོར་ནི་བྱི་བ་འདྲ། །
བླུན་པོའི་དྲུང་དུ་མཁས་པ་བས།།
སྤྲེའུ་འཛིན་པ་ཁྱད་པར་འཕགས།།
སྤྲེལ་འཛིན་ཟས་དང་ནོར་གྱིས་མཆོད།།
མཁས་པ་ལག་པ་སྟོང་པར་འགྲོ། །
ཡོན་ཏན་མེད་པའི་སྐྱེ་བོ་རྣམས།།
ཡོན་ཏན་ཅན་ལ་ལྷག་པར་སྡང་།།
གངས་ཀྱི་ཡུལ་དུ་དགུན་སྐྱེས་པའི།།
ལོ་ཏོག་ལྟས་ངན་ཡིན་ཞེས་སྒྲོགས། །
ཡོན་ཏན་ལོག་པར་སྦྱངས་པ་འགས།།
ལེགས་པར་སྦྱངས་པ་ཁྱད་དུ་གསོད།།
ལྦ་བ་མེད་ན་གླིང་ཕྲན་འགར།།
ཡན་ལག་ཉམས་པའི་སྐྱོན་དུ་བྱེད། །
ཆོ་ག་ཉམས་པར་བྱེད་པ་རྣམས།།
ཆོ་ག་ཚང་བར་བྱེད་ལ་བརྙས།།
ཙུ་ཏའི་ཡུལ་དུ་ཕྱིན་པ་ན།།
རྐང་གཉིས་པ་ལ་མིར་མི་བརྩི། །
ཆོ་ག་ལོག་པར་བསྒྲུབ་པ་འགས།།
ཡང་དག་ཆོ་ག་བྱེད་ལ་གཤེ།
སྐྱེས་བུ་ཁྱི་ཡི་མགོ་ཅན་རྣམས།།
བཞིན་བཟང་བུད་མེད་ཡིན་ཞེས་བརྙས། །
ལོག་འཚོའི་ཟས་ནོར་རྙེད་པ་འགས།།
མཁས་པ་དབུལ་པོ་ཁྱད་དུ་གསོད།།
སྤྲེལ་རྒན་རྣམས་ཀྱིས་མི་བཟུང་ནས།།
མཇུག་མ་མེད་ཅེས་བཞད་གད་བྱེད། །
དེས་ན་ལས་ཀྱིས་མནར་བ་ན།།
མཁས་པ་བླུན་པོའི་ནང་དུ་འཁྱམས།།
རླུང་གིས་བདས་པའི་མ་ལི་ཀ།
དྲི་ཞིམ་ཕྱག་དར་ཁྲོད་ན་བརྫི། །
སྐྱོན་རྣམས་འབད་པས་འཛིན་བྱེད་ཅིང་།།
ཡོན་ཏན་རྩ་ནས་མི་ཆགས་པ།།
སྐྱེས་བུ་ངན་པ་ཆུ་ཚགས་བཞིན།།
ངན་པ་འཛིན་གྱི་བཟང་པོ་འཆོར། །
ལེགས་ཉེས་དཔྱོད་པའི་བློ་གྲོས་མེད།།
མཁས་པའི་མདུན་སར་ཕྱིར་ཕྱོགས་འགྲོ།
ཟས་ནོར་ཁོ་ནའི་གཏམ་གྱིས་འདས།།
རྐང་གཉིས་པ་ཡི་ཕྱུགས་སུ་བཤད། །
བློ་ཆུང་མང་དུ་འདུས་ན་ཡང་།།
བྱ་བ་ཆེན་པོ་བསྒྲུབ་མི་ནུས།།
རྩི་རྐྱང་མང་དུ་བསྡོམས་ན་ཡང་།།
ཁང་པའི་གདུང་མ་བཟོད་པར་དཀའ། །
མ་དཔྱད་པ་ལས་དོན་གྲུབ་པ།།
བྱུང་ཡང་མཛངས་པར་སུ་ཞིག་བརྩི།།
སྲིན་བུ་དག་གིས་ཟོས་པའི་རྗེས།།
ཡི་གེར་བྱུང་ཡང་ཡིག་མཁན་མིན། །
བློ་གྲོས་ཞན་པའི་འདོད་གཏམ་དང་།།
ཅང་ཤེས་མིན་པའི་རྟ་མཆོག་དང་།།
གཡུལ་ངོར་ལྷུང་བའི་རལ་གྲི་རྣམས།།
སུ་ཡི་གྲོགས་འགྱུར་ངེས་པ་མེད། །
ཤེས་རབ་མེད་པའི་བླུན་པོ་རྣམས།།
མང་ཡང་དགྲ་བོའི་དབང་དུ་འགྱུར།།
གླང་ཆེན་སྟོབས་ལྡན་ཁྱུར་ལོངས་པ།།
རི་བོང་བློ་ལྡན་གཅིག་གིས་བཏུལ། །
ཤེས་རབ་མེད་པའི་ལོངས་སྤྱོད་ཀྱང་།།
ཕལ་ཆེར་རང་ལ་ཕན་པ་ཉུང་།།
འདོད་འཇོ་བ་ཡི་འོ་མ་ཡང་།།
བེ་འུས་འཐུང་བ་བརྒྱ་ལམ་ཡིན། །
བླུན་པོ་རྣམས་ཀྱིས་མཁས་པ་ཡང་།།
མཆོད་པར་འགྱུར་བའི་ངེས་པ་མེད།།
ཉི་མ་ཤིན་ཏུ་འོད་གསལ་ཡང་།།
འབྱུང་པོའི་གདོན་རྣམས་མི་འབྲོས་སམ། །
བླུན་པོ་ལོངས་སྤྱོད་གསོག་རྣམས་ལ།།
གཉེན་གྱི་བསམ་པ་ག་ལ་ཡོད།།
སྡིག་སྡུག་གཏམ་ངན་ཁོ་ན་ཡིས།།
བྱི་བ་བཞིན་དུ་བསགས་ནས་འཆི། །
སྐྱེ་བོ་ངན་པའི་ཚོགས་ནང་དུ།།
ཡོན་ཏན་ལྡན་ཡང་ག་ལ་འཁུར།།
སྦྲུལ་གདུག་གནས་པའི་ས་ཕྱོགས་སུ།།
སྒྲོན་མེ་གསལ་ཡང་འོད་མི་འབྱིན། །
ལོངས་སྤྱོད་ཡོད་ཀྱང་ལས་ངན་གྱིས།།
འཇུངས་པས་སྤྱོད་པའི་རང་དབང་མེད།།
རྒུན་འབྲུམ་སྨིན་པ་ཟ་བའི་ཚེ།།
ཁྭ་ལ་མཆུ་ནད་རྒྱུན་དུ་འབྱུང་། །
རྒྱུན་དུ་གཞན་གྱིས་སྐྱོང་དགོས་པའི།།
སྐྱེ་བོ་ནམ་ཞིག་ཅི་ནས་ཉམས།།
བྱ་རོག་གིས་ནི་བཟུང་བ་ཡི།།
རུས་སྦལ་ས་ལ་ལྷུང་ཞེས་གྲགས། །
བཟང་ངན་མི་ཤེས་དྲིན་བྱས་བརྗེད།།
ངོ་མཚར་གཏམ་ལ་མཚར་མི་འཛིན།།
མངོན་སུམ་མཐོང་བ་སླར་ཡང་འདྲི།།
ཞུམ་ཞིང་རྗེས་འབྲང་བླུན་པོའི་རྟགས། །
དྲོད་ཆུང་ཁ་ཡིས་དགྲ་བོ་འདུལ།།
རྒྱང་ནས་མཐོང་ན་ཅ་ཅོ་འབྱིན།།
འཐབ་སར་ཕྲད་ན་ཐལ་མོ་སྦྱོར།།
རང་ཁྱིམ་སླེབས་ན་ང་རྒྱལ་སྨྲ། །
སྡར་མ་གྲོས་བྱེད་ཚེ་ན་དཔའ།།
ཁྲལ་བསྐོས་པ་ན་ནོར་རྩིས་འདེབས།།
འགྲོ་དགོས་པ་ན་ནད་བུ་ལྡང་།།
འཐབ་སར་རྒྱང་ནས་འབོད་ཅིང་བསྒོ། །
བློ་ཆུང་ཅུང་ཟད་རྒྱལ་བས་ངོམས།།
གལ་ཏེ་ཕམ་ན་གཉེན་ལ་འཁང་།།
གྲོས་ལ་འཚོགས་ན་འཐབ་རྩོད་སློང་།།
གསང་གྲོས་བྱས་ན་ལྐོག་ཏུ་སྨྲ། །
གཡུལ་ངོར་རྒྱན་ལ་བྱི་དོར་བྱེད།།
དགྲ་དང་ཕྲད་ན་རང་ཕྱོགས་སྦེད།།
འགྲོ་ན་དགྲ་བས་གཉེན་ཕྱོགས་འཇིགས།།
མཚོན་ཆ་དགྲ་ཡི་ལག་ཆར་འཕེན། །
དཔུང་ཚོགས་འགྲོ་ན་མཇུག་སྡུད་ལ།།
ལྡོག་ན་དེ་ཡི་སྣ་འདྲེན་བྱེད།།
བཟའ་བཏུང་མཐོང་ན་ནན་གྱིས་འཇུག།
དཀའ་བ་མཐོང་ན་ཐབས་ཀྱིས་འབྱོལ། །
སྐྱེ་བོ་ངན་པའི་མཚན་ཉིད་ལ།།
བརྗོད་རྒྱུ་དུ་མ་ཡོད་མོད་ཀྱང་།།
ངན་སྐྱུགས་ཁྲོན་པ་སུ་ཞིག་སློང་།།
སྐྱུགས་པ་མཁས་པ་སུ་ཞིག་མྱོང་། །
མཆུ་བསྐྱོད་པ་ཡིས་བརྡ་སྤྲོད་ཅིང་།།
སྨོས་པའི་ཚེ་ན་མིག་འཛུམ་བྱེད།།
རྣམ་ཐར་ཐོས་ན་འཁུན་འཆོར་བ།།
གང་ལ་བྱུང་ཡང་ཐ་ཤལ་རྟགས། །
ལེགས་པར་བཤད་པ་རིན་པོ་ཆེའི་གཏེར་ལས་བླུན་པོ་བརྟག་པ་སྟེ་རབ་ཏུ་བྱེད་པ་གསུམ་པའོ།། །།
Install Quicktime
-
For the audio files